Өскеменде Ұлттық ұланның «Шығыс» өңірлік қолбасшылығының әскери кеңесі өтті. Оған өңірлік қолбасшылыққа қарасты әскери бөлімдердің командирлері мен басқарма офицерлері қатысты. Кеңес барысында генерал-майор Арман Жұмағалиев жеке құрамның жауынгерлік қызметін жетілдіру, офицерлер мен сержанттардың кәсіби шеберлігін дамыту, сондай-ақ әскери қызметшілердің денсаулығы мен ауқаттануына ерекше назар аудару керектігін атап өтті.  

«Шығыс» өңірлік қолбасшысының тәрбие және әлеуметтік-құқықтық жұмыстар жөніндегі орынбасары полковник Атабек Салықбаев 2024 жылғы әскери тәртіп пен заңдылықтың жай-күйі туралы баяндама жасап, 2025 жылдың бірінші жартыжылдығына арналған міндеттерді белгіледі.  

Кеңес аясында оқу-әдістемелік жиын ұйымдастырылып, Ұлттық ұланның өзекті мәселелері талқыланды. Әскери бөлім командирлері өз тәжірибелерімен бөлісіп, баяндамалар жасады.  

Іс-шара соңында үздік деп танылған әскери бөлімдерге дипломдар мен ауыспалы кубоктар табысталды. Сонымен қатар, үздік нәтижеге қол жеткізген әскери бөлімнің қызметін қамтамасыз етуге арналған қызметтік автокөліктің кілті берілді.  

«Шығыс» өңірлік қолбасшылығының баспасөз қызметі