Өскемен қаласындағы Күленов кентінде орналасқан Әлия Молдағұлова атындағы 16-шағын аудан тұрғындары Наурыз мейрамын ерекше ықыласпен атап өтті, деп хабарлайды Altainews.kz тілшісі.  

Бұл мерекенің басты ерекшелігі – оны ұйымдастыруға ешбір мемлекеттік мекеме немесе кәсіпкерлік құрылым демеушілік көрсеткен жоқ. Тұрғындар өзара бірігіп, әр үйдің Мүлік иелері бірлестігі төрағаларының бастамасымен қаражат жинап, аулаларында екі киіз үй тігіп, сахна орнатып, ұлттық ойындар мен мәдени-спорттық шаралар өткізді.  

Киіз үйлердің алды нағыз мерекелік алаңға айналды. Будақтаған самауырдың иісі, арнайы садақ ату алаңы, сахнада шырқалған әсем әндер – бәрі де Наурыз думанының сәнін келтірді.  

Ауданның құрметті ақсақалдары Сабыр Оспанов, Марат Сүлейменов, Сайлаухан Дәрібаев жиналған халыққа ақ батасын беріп, ізгі тілектерін жеткізді.  

Мерекеге келгендерге тегін Наурыз көже мен палау таратылды. Сонымен қатар, арқан тарту, гір көтеру, садақ ату сияқты ұлттық спорт түрлерінен жарыстар ұйымдастырылып, жеңімпаздарға арнайы сыйлықтар табысталды.  

Ұлттық салт-дәстүрімізді дәріптеп, халықтың бірлігін арттырған бұл Наурыз мерекесі ел жадында ұзақ сақталары сөзсіз.