ШҚО: Аймақтағы жас ғалымдарды қолдауға жағдай жасалынады
«AMANAT» партиясы жанындағы әйелдер қанаты облыстағы жас ғалымдармен кездесіп, олардың ғылыммен айналысуына тиімді жағдайлар туғызудың мүмкіндіктерін, елімізде ғылымды дамытудың болашағын талқылады, деп хабаралайды Altainews.kz тілшісі.
Кездесуге келген жас ғалымдар, облыстағы жоғары оқу орындарының оқытушылары алдымен Д. Серікбаев атындағы ШҚТУ ғылыми орталықтарына экскурсия жасап, жоғары оқу орнының ғылыми жетістіктерімен танысты.
Шара барысында аймақтың ЖОО-дағы, өндірістеріндегі жас ғалымдар «Қазақстан ғылымындағы жас ғалымдардың рөлі» тақырыбында ұйымдастырылған дөңгелек үстел басына жиналды.
«AMANAT» партиясы облыстық филиалының төрайымы Сайрангүл Жұмаділованың айтуынша, ғылымды дамыту – «AMANAT» партиясы жанындағы әйелдер қанаты жұмысының 10 басым бағыттарының бірі болып келеді. Партияның әйелдері қоғамның прогрессивті өкілдері ретінде ғылымды насихаттауға және ғалымдардың мәртебесін арттыруға белсене қатысуда. Өндірісте еңбек ететін әйелдердің еңбек қауіпсіздігі мен құқықтарын қорғау да партия жұмысының маңызды бағыттардың бірі болып табылады.
Мемлекет басшысы Қасым-Жомарт Тоқаев мемлекет тарапынан ғылымға жан-жақты қолдаулар көрсетуді елімізді дамытудың стратегиялық міндеттерінің бірі етіп қойып отыр. Соңғы жылдары ғылыми зерттеулерді мемлекеттік қаржыландырудың көлемін ұлғайту және тетіктерін жетілдіру, ғылыми ұйымдарды кезең-кезеңімен жаңғырту шаралары белсенді жүргізіліп, шетелде тағылымдамадан өтетін жас ғалымдардың саны ұлғаюда, докторантураға және ғылыми зерттеулерге бөлінген гранттар саны артып келеді. Ғылымды дамытуға, жас ғалымдарға қолдау көрсетуге орай қолданыстағы ғылым, білім саласындағы құқықтық-нормативтік заңдылықтарға толықтырулар да енгізіліп жатыр.
Д. Серікбаев атындағы ШҚТУ ректоры Сәуле Рахметуллина кездесуде жас ғалымдарға қолдау көрсету шараларының жалғаса беретінін, жобаларды қаржыландырудың, өндіріске енгізудің мүмкіндіктері қарастырылып, жас ғалымдардың шығармашылығына жағдай жасау жалғасын табатынын атап өтті. Былтыр аталған оқу орнында мемлекеттік «Жас ғалым» бағдарламасымен 290 жас ғалым жеңілдікпен пәтер сатып алған. Қазіргі күні де пәтер алуға құжаттарын дайындап жатқан жас ғалымдар бар.
Кездесу соңында жас ғалымдар «AMANAT» партиясы қатарына қабылданды.
Жанаргүл Көкенайқызы
Фото: Жібек Нұрахмет
