Бүгін Өскемен қаласында Зайсан ауданының қыздар волейбол командасының капитаны болған Жұлдыз Ахметсәлімқызын еске алуға арналған 2008–2011 жылы туған қыздар арасындағы волейболдан облыстық ашық біріншілік басталды, деп хабарлайды Altainews.kz тілшісі.

Турнирге еліміздің әр өңірінен 14 команда қатысып отыр. Жарыс облыстық деңгейде өткізілгенімен, ашық форматта ұйымдастырылғандықтан, Астана, Жетісу, Абай облыстары, Семей қаласы және Шығыс Қазақстан облысының барлық аудандарынан спортшылар жиналды. Жарыс екі күнге созылады.

Облыстық волейболдан мамандандырылған балалар-жасөспірімдер олимпиадалық резерв спорт мектебінің директоры Болатбек Даумовтың айтуынша, турнирдің басты мақсаты – 1–10 мамыр аралығында Тараз қаласында өтетін жастар ойындарына үздік командаларды іріктеу.

Жұлдыз Ахметсәлімқызын еске алу турнирі бұған дейін 19 жыл қатарынан Зайсан ауданында өтсе, биыл 20-рет ұйымдастырылып, облыс орталығында республикалық деңгейде өткізіліп отыр.

Жұлдыз Әбішева 1990-жылдары волейболды дамытуға белсенді атсалысып, командасына киім-кешек пен құрал-жабдықты өзі жеткізіп, жаттықтырып, демеушілік еткен. Көптеген жарыстарда жүлделі орындарға ие болған команда бүгінде оның ісін жалғастырып келеді.

Турнирдің бас төрешісі Сәуле Серікбаеваның айтуынша, бұл жарыс тек сайыс қана емес, спортты насихаттау алаңы.

Жарыс Шығыс Қазақстан облысының дене шынықтыру және спорт басқармасының қолдауымен және марқұмның туыстарының демеушілігімен ұйымдастырылуда. Бұл турнир – салауатты өмір салтын насихаттау мен жас спортшыларды қолдаудың жарқын үлгісі.

Фото: Жібек Нұрахмет

Видео: Ермек Жиенбеков