Өскемен қаласында көгалдандыру жұмыстары жалғасып жатыр. Бүгін Қазақстан көшесі бойындағы трамвай жолының жанына 38 түп қарағай көшеті егілді, деп хабарлайды Altainews.kz тілшісі.

Экологиялық бастаманы ауыл шаруашылығы вице-министрі Аманғали Бердалин, облыс әкімі Нұрымбет Сақтағанов, мәслихат депутаттары мен еріктілер қолдап, жас көшеттерді отырғызу жұмысына белсене қатысты.

Қарағай – табиғи сүзгі қызметін атқаратын, қалалық ортаға жақсы бейімделетін, ауа құрамындағы зиянды заттарды сіңіріп, ортаны тазартып тұратын, төзімді әрі көпжылдық ағаш түрі. Басқа ағаштарға қарағанда қарағайдың тозаң мен газға төзімділігі жоғары, ал шаң мен көлік түтінін сіңіру қасиеті күшті. Сондықтан қала ауасын жақсарту үшін дәл осы ағаш түрі таңдалған.

Отырғызылған көшеттердің жерсініп, толыққанды өсуі үшін тұрақты түрде күтім жасалатын болады.

«Таза Қазақстан» тек сенбілікпен немесе айналаны тазалаумен шектелмейді. Бұл – көгалдандыру, экологиялық мәдениетті арттыру, азаматтық жауапкершілікті қалыптастыру сынды бағыттарды қамтитын кең ауқымды мемлекеттік бастама. Алғашында акция ретінде басталған бұл жоба бүгінде елдік мәнге ие жүйелі бағдарламаға ұласты.

Мұндай бастамалар қала тұрғындары мен жастарының экологиялық ойлауын қалыптастырып, табиғатқа деген жауапкершілікті арттыруға бағытталған.