1 маусым – Балаларды қорғау күніне орай Өскемен қаласында облыс әкімі Нұрымбет Сақтағанов дарынды оқушылармен кездесті. Бұл – республикалық және халықаралық олимпиадаларда, спорттық жарыстар мен шығармашылық байқауларда жүлделі орын алған шәкірттердің мерейін өсірген ерекше сәт болды.

Мерекелік шара Республика алаңында өтті. Оқушылардың ғылыми жобалары мен шығармашылық жұмыстарының көрмесі ұйымдастырылып, облыс әкімі олардың жетістіктерімен танысты. Жас дарындар өз жобаларын мақтанышпен таныстырып, жаңалықтарының мазмұнын, жұмыс тәсілдерін егжей-тегжейлі түсіндірді.

Былтырғы оқу жылында шығысқазақстандық оқушылар 185 медаль жеңіп алды. Оның ішінде 22 алтын, 67 күміс және 96 қола. Табиғи-математикалық бағыттағы республикалық олимпиаданың қорытындысы бойынша облыс командасы «Үздік олимпиадалық команда» аталымында республикадағы үш үздік құраманың қатарына енді. Сонымен қатар ауыл мектептеріне арналған жалпы білім беретін пәндер бойынша республикалық олимпиадада ШҚО командасы жаратылыстану-математика бағытынан үздік деп танылды. Бұл – өңір үшін үлкен жетістік.

Кездесу барысында дарынды оқушыларға облыс әкімінің атынан Алғыс хаттар мен сертификаттар табысталды. Бұл – олардың білім мен мәдениеттің дамуына қосқан үлесіне көрсетілген құрмет пен қолдаудың белгісі.

Дамир Омаров

Фото: Махаббат Ахметжанова

Видео: Руслан Акматалиев