Риддер қаласы 2025 жылдың алғашқы бес айында тұрақты экономикалық серпін көрсетіп, өнеркәсіп өндірісі мен инвестиция көлемі айтарлықтай артты. Шаһардың өнеркәсіп секторы 75,9 млрд теңгенің өнімін өндіріп, өткен жылмен салыстырғанда 13,5 %-ға өскен. Ал негізгі капиталға құйылған инвестициялар 15,5 %-ға ұлғайып, қаланың қаржылық белсенділігін көрсетті. Бұл көрсеткіштер әлемдік нарықтағы тұрақсыздыққа қарамастан, Риддердің сенімді даму жолында екенін айғақтайды, деп хабарлайды Altainews.kz тілшісі Өңірлік коммуникациялар қызметі ақпаратына сүйене отырып.

Қала әкімінің орынбасары Болат Ақужановтың айтуынша, өнеркәсіп әлі де Риддер экономикасының локомотиві саналады. Әсіресе, мырыш бағасының құбылмалы болғанына қарамастан, өндіріс көлемінің өсуі – кәсіпорындардағы тұрақты жұмыс пен технологиялық бейімделудің нәтижесі. Ауыл шаруашылығы саласы да 21,3 %-ға өсіп, қала тіршілігіне маңызды үлес қосты.

Сауда саласында серпіліс байқалады: бөлшек сауда айналымы 10,8 %-ға артса, көтерме сауда көлемі төрт есеге ұлғайған. Бұл – тұтыну нарығы мен логистика саласының белсенділігін айғақтайды. Қаланың инвестициялық климатын негізінен жеке сектор қалыптастырып отыр — жекеменшік салымдар барлық инвестицияның үштен екісінен астамын құрады.

Құрылыс саласында орындалған жұмыстардың көлемі 54 %-ға өсіп, жаңа тұрғын үйлер пайдалануға берілді. Бұл Риддердегі инфрақұрылымның кеңеюі мен өмір сапасының артуын білдіреді.

Әлеуметтік салада да тұрақтылық сақталған. Қалалық бюджет артығымен орындалып, жұмыспен қамту деңгейі тұрақты қалыпта қалды. Алайда білікті кадр тапшылығы әлі де өзекті мәселе күйінде. Қала халқы сәл азайғанымен, мектепке дейінгі біліммен қамту көрсеткіші 100 %-ға жақындаған, бұл – білім беру саласындағы жұмыстың нәтижесі.

Медицина саласында да оң үрдістер бар: туберкулезге шалдығу көрсеткіші төмендеп, ана өлімі тіркелмеген. Алайда онкологиялық сырқаттар бойынша көрсеткіштер артқан. Құқық қорғау саласы бойынша жалпы қылмыс деңгейі бақылауда сақталғанымен, құқықбұзушылықтар саны сәл көбейген.

Жалпы алғанда, Риддер қаласының 2025 жылдың алғашқы тоқсанындағы нәтижелері өңірдің дамуға бағытталған нақты әрі қарқынды қадамдарын көрсетіп отыр.