Қарт Алтайдың баурайындағы әсем табиғат пен бай тарихты бойына сіңірген Катонқарағай ауданы маусым айында мәдениет пен руханияттың ордасына айналмақ. Алдағы 13-15 маусым күндері мұнда ұлттың рухани жадына, әдеби-мәдени мұрасына тағзым етер бірегей шаралар легі өтеді. Бұл – жай ғана мерейтой емес, бұл – Алтайдың алқабында өтетін ұлттық рух пен мәдени жадыны жаңғыртатын үш күндік рухани керуен.

Бағдарлама елімізге белгілі қаламгер Дидахмет Әшімханұлына арналған ғылыми конференциядан басталып, халықаралық ақындар айтысы мен ұлттық ойындар сайысына ұласады. Бұл – туған жерін тануға, өткенді қадірлеуге, әдебиет пен өнердің құдіретін сезінуге шақыратын үлкен рухани оқиға. 

13 маусымда, сағат 11.00-де Катонқарағай ауылының Мәдениет үйінде ғылыми конференция басталады. Басқосуда қаламы өткір, сөзі салмақты жазушы Дидахмет Әшімханұлының шығармашылығы мен оның ұлттық әдебиетке қосқан зор үлесі сараланады. Бұл зиялы қауым мен жас әдебиетшілер үшін тағылымы мол тағзым сәті болмақ.

Сол күні кешкі сағат 17.00-де Алтай тауының баурайында, Топқайың ауылының өр жағында «Төр Алтай
Қалиханы мен Дидахметін жырлайды» поэзия фестивалі өтпек. Табиғаттың аясында – дала сахнасында ақындар жыр толғайды. Қ.Ысқақ пен Д.Әшімханұлының рухына арналатын бұл фестиваль – сөз өнерінің салтанаты, поэзиямен тыныстағысы келгендер үшін таптырмас мүмкіндік.

Фестивальдің келесі күні «Ұлттық өнер мен түркі рухының күні» аталып отыр. Бұл күні сағат 10.00-де Катонқарағай ауылының ипподромында «Алтай – алтын бесігім» халықаралық ақындар айтысы басталады. Қыз бен жігіттей қағытқан, шындық пен шеберлікпен шарпыған суырыпсалма ақындардың сөз сайысы – ел бірлігінің, ұлттық ой мен намыстың көрінісі.

Дәл осы уақытта Берел ауылындағы «Берел» музей-қорығында көшпелі кеңес ұйымдастырылады. Түркі мәдениеті мен мұрасы қоры жанындағы реставраторлар мен тарихшы-сәулетшілердің қатысуымен өтетін көшпелі кеңес – тарихи мұраға деген жауапкершілік пен болашаққа аманаттың үлгісі.

Кешкі сағат 18.00-де Катонқарағай атшабарында «Алтай – түркі әлемінің алтын бесігі» музыкалық фестивалі, гала-концерт басталмақ. Бұл кеш түркі халқының ортақ тамыры мен рухани туыстығын паш етеді. Мәселен, сахна төріне шығатындардың қатарында Саха Республикасынан келген ұлттық өнер шебері Юлиана Кривошапкина да бар. Оның хомуспен орындайтын туындылары – адам жанын тереңге жетелер, дала үнін жаңғыртар тылсым өнер.

Фестивальдің соңғы, үшінші күні кезек ұлттық ойындар мерекесіне берілмек. Осы күні сағат 10.00-де Катонқарағай ауылындағы ипподромда бәйге, көкпар, жамбы ату, теңге ілу сайыстары басталады. Ұлттық ат спортының көркі – тек жарыс емес, рухтың ұшқыны. Бұл – батыр бабалардан қалған салттың қазіргі ұрпақпен қайта қауышар сәті. Ат дүбірі мен көрерменнің шаттығы жазғы мерекенің шынайы көрінісі болмақ.

Бұл – шетел асып, жат жұртты шарламай-ақ, өз еліңде рухани байып, мәдени серуен жасауға берілген керемет мүмкіндік. Катонқарағай – тек табиғат тамашасы емес, ұлттық рухтың алтын бесігі. Туристік маусым шымылдығын осындай тағылымды шаралармен ашу – отандық туризмді қолдаудың, туған жерге тағзым етудің ең жарқын көрінісі.

Алтай төрінде өтетін бұл мерейтойлық бағдарламалар – тек мереке емес, ұлт жадын жаңғыртатын мәдени қозғалыс. Катонқарағай сізді күтеді. Өнерсүйер қауымға есік ашық!