Катонқарағайда өтіп жатқан «Алтай – түркі әлемінің алтын бесігі» халықаралық фестиваліне шетелден келген қонақтар да қызығушылық танытуда. Олардың бірі – Польшада туған, бүгінде Швецияда тұратын Виктор Сачава. Табиғат пен түркі мәдениетіне қызығушылық танытатын саяхатшы фестиваль аясында ұлттық ойындарды тамашалап, қазақтың қонақжайлығына риза болғанын айтып берді, деп хабарлайды  Altainews.kz тілшісі.

Ол – табиғат пен түркі әлемінің тарихына қызығушылық танытып, арнайы осы фестивальге келген қонақтардың бірі.

Виктор Қазақстанға алғаш рет келіп отырғанын және мұндағы табиғат пен адамдардың қонақжайлығына ерекше тәнті болғанын айтады. Айтуынша, ол орыс тілін өз бетінше үйренген, славян тілдеріне қызығушылығы үлкен. Ал қазақ тілін әлі білмегенімен, Қазақстан мәдениетіне құрметпен қарайтынын жеткізді.

Сұхбат соңында шетелдік мейман қазақтың ұлттық тағамдарына да тоқталып өтті.

Айта кетейік, «Алтай – түркі әлемінің алтын бесігі» атты халықаралық фестиваль аясында ұлттық ойындар, ақындар айтысы, ғылыми конференциялар мен мәдени шаралар ұйымдастырылуда. Бұл – тек жергілікті емес, халықаралық деңгейдегі қатысушылар үшін де рухани жаңғыру алаңы болып отыр.