Шығыс Қазақстан облысында денсаулық сақтау саласын жаңғырту жұмыстары жүйелі түрде жалғасып жатыр. Бүгінде негізгі көңіл – медицина мамандарын дайындауға, жаңа технологиялар әкелуге және емдеу мекемелерінің жағдайын жақсартуға бөлініп отыр. Облыс әкімі Нұрымбет Сақтағанов денсаулық сақтау жүйесін өңір дамуының маңызды бағыттарының бірі ретінде атады, деп хабарлайды Altainews.kz тілшісі.

Шығыс Қазақстан медицина қызметкерлерін марапаттау салтанатында аймақ басшысы атқарылған жұмыстар мен алдағы жобалар туралы айтты.

2025 жылы облыстағы медициналық кадрлардың біліктілігін арттыру бағдарламасын жүзеге асыруға 420 миллион теңге бөлінді. Бұл қаражатқа басым бағыттар бойынша 72 маман оқытылады. Өңірде кадр тапшылығын шешу жүйелі сипат алған: 2024 жылы сұранысқа ие 15 дәрігерге 100 айлық есептік көрсеткіш көлемінде бірреттік төлем берілді. Биыл тағы 14 дәрігерге осындай қолдау көрсетілмек.

Материалдық-техникалық базаны жаңарту да жалғасуда. 2024 жылы 21 медициналық мекеме 456 медициналық құрылғымен (жалпы сомасы 3,3 млрд теңге) қамтамасыз етілді. Биыл тағы 18 мекемеге 4,8 млрд теңге көлемінде жабдықтар жеткізіледі.

Күрделі жөндеу жұмыстары да жүргізілмек: 2024 жылы 7 нысан жөнделсе (2,5 млрд теңге), 2025 жылы тағы 10 нысанға жөндеу жүргізіледі (2,1 млрд теңге).

Ауылдық аймақтарға ерекше назар аударылуда. «Ауылдық денсаулық сақтауды жаңғырту» ұлттық жобасы аясында 35 жаңа медициналық нысан салынды, жыл соңына дейін тағы бір емхана пайдалануға беріледі – Шемонаиха ауданына қарасты Волчанка ауылында.

2025 жылы Шығыс Қазақстан облысында бірқатар маңызды денсаулық сақтау нысандарының құрылысы мен жаңғырту жұмыстары жалғасады.

Атап айтқанда, Өскеменде Гематология орталығы мен 200 орындық көпбейінді стационар салынып жатыр. Риддер қаласында бір ауысымда 500 адамды қабылдай алатын жаңа емхананың құрылысы жүргізілуде. Сонымен қатар, Онкология және хирургия орталығының хирургиялық корпусы қайта жаңартылып, үш қабаты толық жөндеуден өтеді.

Ана мен бала орталығы жанындағы перзентханаға да күрделі жөндеу жұмыстары жүргізіледі. Ал Қасым Қайсенов кентінде ауысымына 150 адамға қызмет көрсетуге қабілетті жаңа емхана пайдалануға берілді.

Шығыс Қазақстан облысында денсаулық сақтау саласын жүйелі түрде жаңғырту жұмыстары жүріп жатыр. Инфрақұрылымды жаңарту, заманауи медициналық жабдықтар сатып алу және мамандармен қамтамасыз етуге бағытталған бұл қадамдар – болашақ ұрпақтың денсаулығын нығайтуға негіз болатын тұрақты әрі сапалы жүйе құруға жол ашады.

Дамир Омаров

Фото: Махаббат Ахметжанова