Мемлекет басшысы Қасым-Жомарт Тоқаев 2020 жылғы Жолдауында елімізде 2 миллиард ағаш отырғызу туралы тапсырма берген еді. Бұл бастама – тек қана ағаш егу емес, елдің табиғатын сақтап, жасыл желекті көбейтуге бағытталған үлкен экологиялық қадам. Шығыс Қазақстанда осы тапсырма аясында ауқымды жұмыстар атқарылып жатыр, деп хабарлайды Altainews.kz тілшісі.

2021-2025 жылдарға арналған арнайы жоспар қабылданып, оған сәйкес облыстағы орман алқаптарын қалпына келтіру және жаңа ормандар өсіру көзделген. Жоспар бойынша 15 мың гектар жерге 76 миллион түп ағаш отырғызу міндеті қойылған. Соңғы үш жылда бұл бағытта айтарлықтай жұмыс атқарылды – 4,8 мың гектарға 24,4 миллион түп көшет егілді. Барлық жоспар уақытында және сапалы орындалған.

Биыл да жұмыс қарқыны бәсеңдеген жоқ. Шығыс Қазақстанның орман шаруашылығы мекемелері мемлекеттік орман қорындағы 3309 гектар аумаққа 15,7 миллион ағаш отырғызуды жоспарлап отыр. Көктемгі науқанда 1276 гектар жерге 6,9 миллион түп көшет егілді.

Облыстық табиғи ресурстар және табиғат пайдалануды реттеу басқармасының айтуынша, орман алқаптарын ұлғайту – бұл тек жасыл желекті көбейту ғана емес, өңірдің экологиясын жақсарту, ауа сапасын көтеру, жануарлар мен өсімдіктердің табиғи мекенін сақтау деген сөз.

Шығыс Қазақстан – орманды аймақ, ал орман – өңірдің өкпесі. Оны қорғау – әр буынның, әсіресе бүгінгі ұрпақтың міндеті. Осы істі жүйелі жалғастыру арқылы алдағы жылдары орман көлемі артып, табиғаттың тозуына жол берілмейді. Бұл – өңірдің тұрақты экологиялық саясатының айқын көрінісі.