ШҚО әкімдігінде өткен активте Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауы талқыланды. Негізгі назар Шығыс Қазақстан облысының әлеуетін ескере отырып, Президент айқындаған міндеттерді іске асырудың нақты қадамдарына аударылды, деп хабарлайды Altainews.kz тілшісі.

Шығыс Қазақстан облысының әкімі Нұрымбет Сақтағанов Президент Жолдауының стратегиялық маңызын ерекше атап өтті.

Облыс әкімі Мемлекет басшысының Жолдауында аймақтарға ерекше көңіл бөлінгенін атап өтті. Қуатты өнеркәсіптік, аграрлық, туристік және зияткерлік әлеуетке ие Шығыс Қазақстан бастамаларды жүзеге асыруда көшбасшы болуға тиіс. Әкімдікте ШҚО-ның әлеуметтік-экономикалық дамуына тікелей әсер ететін негізгі бағыттар жария етілді:

Біріншіден – инвестиция тарту. Арнайы экономикалық аймақтардың мүмкіндіктерін кеңейту және өндіріс орындарын орналастыруға жағдай жасау көзделуде.

Екіншіден – өңдеу өнеркәсібін дамыту. Шығыс Қазақстанда ішкі және сыртқы нарықта сұранысқа ие терең өңделген өнім өндіруге арналған жеткілікті база бар.

Үшіншіден – ауыл шаруашылығын жаңғырту. Басым бағыттар – агрохабтар құру, логистиканы дамыту және шетелдік инвесторлармен стратегиялық әріптестік орнату.

Төртіншіден – көлік және туризм. Өңірлік көлік қатынасын дамыту, халықаралық транзиттік дәліздер аясында автожолдар салу, сондай-ақ туристік инфрақұрылымды кешенді дамыту міндеттері қойылды.

Бесіншіден – тұрғын үй-коммуналдық шаруашылық. Су инфрақұрылымын қоса алғанда, коммуналдық жүйелерді кешенді жаңғырту қажет.

Алтыншыдан – кәсіпкерлік пен цифрландыру. Кәсіпкерлер цифрлық дамудың қозғаушы күші болуға тиіс. Осы орайда құқықтық базаны жаңарту және даму институттарының жұмысын жандандыру маңызды.

Жетіншіден – адами капиталды дамыту. Білім беру саласына ерекше рөл берілген. «Келешек мектептері» ұлттық жобасы аясында жасанды интеллектпен жұмыс істей алатын мамандар даярлау басталады. Сонымен қатар жұмысшы мамандықтарының беделін арттыру және лайықты еңбекақыны қамтамасыз ету негізгі міндеттердің бірі ретінде белгіленді.

Аймақ басшысы Жолдаудағы тапсырмалардың өңірлік күн тәртібімен тікелей байланысты екенін атап өтті.

Мемлекеттік органдардың, жоғары оқу орындарының және азаматтық сектордың өкілдері белгіленген міндеттерді орындау тетіктерін талқылап, цифрлық технологияларды жедел енгізу үшін әртүрлі салалардың өзара ықпалдастығы мен мамандардың бірлескен жұмысының маңызын атап өтті.

Жиын қорытындысы бойынша түрлі бағыттар бойынша жол карталарын әзірлеу туралы шешім қабылданды. Онда нақты жобалар, мерзімдер және жауапты орындаушылар көрсетілмек. Келесі кезең – бұл жоспарларды жұмыс топтарында талқылап, ұсыныстарды қалалық, облыстық және республикалық деңгейлерге шығару.

Басты мақсат – Шығыс Қазақстанға жасанды интеллект дәуірінде елдің жетекші аймақтарының бірі мәртебесін бекіту.

Дамир Омаров
Фото: Махаббат Ахметжанова