Қысқы демалысты белсенді өткізгісі келетіндер үшін Шығыс Қазақстан облысы бірнеше қолайлы бағыт ұсынады. Табиғаты көркем, инфрақұрылымы дамыған тау шаңғы базалары демалысты спортпен және таза ауамен ұштастыруға мүмкіндік береді, деп хабарлайды Altainews.kz.

Өскеменге жақын орналасқан «Алтай Альпісі» тау шаңғы курорты – қысқы демалысқа жиі таңдалатын орындардың бірі. Мұнда әртүрлі деңгейдегі 12 еңіс, шаңғы мен сноубордқа арналған трассалар, сондай-ақ демалуға қажетті қызметтер бар. Маусым қарашадан сәуірге дейін жалғасады.

Отбасымен демалуға қолайлы, облыс орталығынан 35 шақырым жердегі «Нұртау» тау шаңғы базасы отбасылық демалысқа лайық. Мұнда балаларға арналған аймақтар, коттедж қалашықтары, тюбинг және фрирайд бағыттары қарастырылған.

Ал Риддер өңірінде бірден екі тау шаңғы орны жұмыс істейді. Stardust Camp табиғат аясындағы тыныш демалысты қалайтындарға арналған. Мұнда тюбинг, шағын трасса және глэмпинг бар.
Ал «Эдельвейс» кешені тәжірибелі шаңғышылар мен спорттық бағыттарды ұнататындар үшін қолайлы. Сертификатталған слалом трассалары да осы жерде орналасқан.

Шығыс Қазақстандағы тау шаңғы бағыттары қысқы демалысты белсенді, қауіпсіз әрі әсерлі өткізуге мүмкіндік береді.