Туризм және спорт министрлігі қысқы туризмді дамыту және отандық туристерге қолайлы бағыттарды таныстыру мақсатында Шығыс Қазақстан облысындағы ең үздік 7 қысқы демалыс орнын ұсынды. Табиғаты көркем, таулы аймақтарға бай бұл өңір қыс мезгілінде белсенді және отбасылық демалысты ұнататындар үшін таптырмас бағыт саналады, деп хабарлайды Altainews.kz тілшісі.

Шығыс Қазақстан – қарлы шыңдары, таза ауасы мен заманауи инфрақұрылымы үйлескен ерекше аймақ. Мұнда тау шаңғысын тебуден бастап, эко-туризм, SPA-демалыс, қысқы балық аулау және агротуризмге дейінгі қызмет түрлері ұсынылады.

1. «Алтай Альпілері» тау шаңғысы курорты

Бұл курорт – өңірдегі ең танымал қысқы демалыс орындарының бірі. Мұнда тек табиғи қар қолданылады, оның қалыңдығы кей жылдары 1,5 метрге дейін жетеді. Трассалар кәсіби спортшыларға да, жаңадан үйренушілерге де лайықталған. Маусым сәуір айының ортасына дейін созылып, ұзақ уақыт демалуға мүмкіндік береді. Орналасқан жері: Өскемен қаласынан 22-30 шақырым, Таулы Үлбі шатқалында.

2. «Нұртау» тау шаңғысы курорты

«Нұртау» курорты – отбасылық демалысқа ыңғайлы кешен. Мұнда жасанды қар жасау жүйесі жұмыс істейді, бұл қар аз жылдары да тұрақты маусымды қамтамасыз етеді. Сонымен қатар түнгі сырғанау, балалар мен ересектерге арналған тюбинг (ватрушка) трассасы бар. Орналасқан жері: Глубокое ауданы, Өскемен қаласынан 35 шақырым.

3. East Pole тау шаңғы курорты

Риддер қаласында орналасқан бұл курорт экстремалды демалысты ұнататын туристер арасында танымал. «Wild East» стиліндегі атмосфера, фрирайд бағыттары, қарда сырғанау турлары және сноутюбинг қызметтері ұсынылады. Табиғи ландшафты сақтай отырып, белсенді демалысқа басымдық беріледі. Орналасқан жері: Риддер қаласы.

4. Altai Mountain Resort

Заманауи архитектура мен жоғары деңгейдегі сервисті ұсынатын курорттардың бірі. Мұнда жаңа үлгідегі көтергіштер, қауіпсіз трассалар және түнгі сырғанау мүмкіндігі бар. Курорт белсенді демалысты сәнді әрі жайлы форматта өткізгісі келетін туристерге арналған. Орналасқан жері: Риддер қаласының маңы.

5. «Слияние» демалыс базасы

Табиғатпен үндес эко-стильдегі бұл демалыс базасы тыныштық пен оңашалықты қалайтын жандар үшін қолайлы. Қыс мезгілінде балық аулау, монша рәсімдері, табиғи ортада серуендеу кеңінен ұсынылады. Орналасқан жері: Өскемен қаласынан 40 шақырым, елді мекендерден алыс аймақта.

6. Zarechye парк-отелі

Жоғары деңгейдегі жайлылықты қалайтын туристер үшін лайықты орын. Мұнда авторлық дизайн, SPA-процедуралар, қарда жүретін техникамен экскурсиялар ұйымдастырылады. Демалыс белсенділік пен релаксацияны қатар ұсынуымен ерекшеленеді. Орналасқан жері: Өскемен қаласынан 60 шақырым.

7. Коробиха ауылындағы демалыс аймағы

Катонқарағай ауданында орналасқан бұл аймақ агротуризмді дамытуымен танымал. Атпен серуендеу, табиғи балымен әйгілі өңірдің өнімдері, дәстүрлі монша туристерге ерекше әсер сыйлайды. Ауылдық өмірмен танысып, табиғи таза ортада демалуға мүмкіндік бар. Орналасқан жері: Катонқарағай ауданы, Коробиха ауылы.

Шығыс Қазақстандағы қысқы демалыс орындары өңірдің туристік әлеуетін арттырып, жыл сайын мыңдаған отандық және шетелдік туристерді тартуда. Әр демалыс орны өз ерекшелігімен дараланып, әр талғамға сай қызмет түрлерін ұсынады.

Қыс мезгілінде демалысты тиімді әрі әсерлі өткізгісі келетіндер үшін Шығыс Қазақстан – сенімді таңдау.