Биыл «Жұмыспен қамтудың жол картасы» бағдарламасы аясында хоккей қорабын қайта құру мен жөндеуге 10 миллион теңге бөлінді.

Мұнда заманауи материалдан жаңа қоршау, қақпа салынып, жарықтандыру жүргізілді. Бір сөзбен айтқанда, спортпен айналысу үшін қолайлы жағдай жасалған.

Шемонаихадағы шағын ауданда жаңартылған хоккей қорабының салтанатты ашылуы Тәуелсіздік күніне орай өтті. Мұнда «Смена» хоккей клубының өрендері жаттығады. 

– Аталмыш клуб өткен ғасырдың 70-ші жылдарының басында пайда болды. Осы клубта жерлес хоккейшілеріміздің бірнеше буыны өсті. Бүгінде «Смена» клубында 20 бала жаттығады. Сергей Пестов оларды 20 жылға жуық уақыт жаттықтырып келеді. Жыл сайын клуб тәрбиеленушілері «Золотая шайба», «Жұлдызша» жарыстарына қатысады, – деп жазылған аудан әкімдігінің ресми парақшасында.

Салтанатты шараға аудан әкімі Григорий Акулов қатысып, клубтың хоккейшілеріне жаңа форма мен құрал-жабдықтар сатып алуға үш миллион теңге сертификат табыс етті.

Салтанатты ашылудан кейін мұз алаңында клуб тәрбиеленушілері мен ардагерлер арасында жолдастық кездесу өтті. Ортаға шайбаны аудан әкімі Григорий Акулов тастады.