ҚР Еңбек және халықты әлеуметтік қорғау бірінші вице-министрі Ақмәди Сарбасов жұмыс сапарымен ШҚО-ға келіп, өңірдегі әлеуметтік мекемелер мен кәсіпорындардың жұмысымен танысты.

Сондай-ақ жергілікті тұрғындармен кездесулер өткізіп, 1 шілдеден бастап ҚР Әлеуметтік кодексі күшіне енгеннен кейін іске асырылатын әлеуметтік-еңбек саласындағы инновациялар туралы түсіндірді, деп хабарлайды Altaynews тілшісі.

Сапар барысында «ALTAI тау-кен металлургиялық сервисі» ЖШС-де болып, қызметкерлермен еңбек саласы мәселелерін талқылады. Эмоция мен мінез-құлқының бұзылуы бар 3-тен 10 жасқа дейінгі балаларға арналған балабақшаның және аутизм спектрі бұзылған балаларға арналған бейімделген бағдарлама бойынша жұмыс істейтін бастауыш мектептен тұратын «Ғажайыптар елі» арнайы түзету мекемесінің қызметімен танысты.

Сонымен қатар вице-министр Халықты әлеуметтік қолдау шараларын белсенді тағайындауды, азаматтарға мемлекеттік қолдау көрсетудің жаңа тәсілдерін, әлеуметтік қызмет көрсету жүйесін трансформациялауды, халықты жұмыспен қамту саласындағы жаңа тәсілдерді, әлеуметтік сақтандыру және зейнетақымен қамсыздандыру жүйелерін дамытуды көздейтін әлеуметтік кодекстің негізгі новеллалары туралы айтып берді.