Инвестициялық жобалардың жалпыұлттық пулына облысымыздан жалпы құны 1,1 триллион теңгенің 42 жобасы кірген. Оның ішіндегі сегіз жоба (81,4  миллиард теңге) 2023 жылы жүзеге асырылған.

Облыс әкімдігінің мәжілісінде баяндама жасаған экономика және бюджеттік жоспарлау басқармасының басшысы Фархад Бельбеев осылай деді, деп хабарлайды Altaynews.kz тілшісі.

Ведомство басшысы Шығыс Қазақстан облысының 2023 жылғы әлеуметтік-экономикалық даму көрсеткіштері туралы айта келе, негізгі көрсеткіштер бойынша оң динамика байқалатынын жеткізді.

Атап айтсақ, өнеркәсіп өндірісінің көлемі бойынша былтыр нақты көлем индексі 103,9 пайыз болса, оның ішінде өңдеу өнеркәсібінің өсімі 105,2 пайызға жеткен.

Белгілі болғандай, өнеркәсіп өнімі өндірісінің ең жоғары өсімі Күршім (143,9 пайыз) мен Ұлан (125,6 пайыз) аудандарында тіркелген. Ал нақты көлем индексінің төмендеуі алты ауданда байқалған. Олар: Шемонаиха (99,7 пайыз), Глубокое (99,1 пайыз), Катонқарағай (95,7 пайыз), Тарбағатай (88 пайыз), Зайсан (85,4 пайыз) және Самар (81,7 пайыз) аудандары.

Басқарма басшысы облыс экономикасына 654,5 миллиард теңге инвестиция құйылғанын, бұл тұрғыдан алып қарағанда, өсу қарқыны 117,9 пайызға (нақты көлем индексі 113,9 пайыз) жеткенін хабарлады.