Өскемен қаласында ҚР еңбек сіңірген мұғалімі, «Дәуірдің дара ұстазы» атанған Қанипа Бітібаева атындағы қазақ тілі мен әдебиетінен республикалық олимпиада өз мәресіне жетті, деп хабарлайды Altainews.kz тілшісі.

Олимпиада жеңімпаздары мен жүлдегерлері ҚР Оқу-ағарту министрлігінің  I, II, III дәрежелі дипломдарымен және «Дарын» республикалық ғылыми-практикалық орталығының грамотасымен марапатталды.

Атап айтқанда, қазылар алқасының шешімімен 23 оқушы 2-орын, 37 оқушы 3-орынды иеленді. Ал «Жүзден жүйрік, мыңнан тұлпар» шыққан 16 оқушы 1-орынға лайық деп танылып, республикалық олимпиаданың жеңімпазы атанды.

Бөдан бөлек, Бітібаевтар әулетінің атынан 10 бала, Жамбыл мектебінің 1996 жылғы түлектерінің атынан 6 балаға арнайы сыйлықтар тапсырылды.

С.Аманжолов атындағы ШҚУ ректоры Мұхтар Төлеген олимпиада жеңімпазы - дарынды балалаларға арналған Жамбыл атындағы облыстық мамандандырылған мектеп-гимназиясының оқушысы Мархабат Саяшова мен №1 Күршім орта мектебінің оқушысы Гүлім Идаятоваға университет грантын табыстады.

Ал Абай облысы Бесқарағай ауданы Беген орта мектебінің оқушысы Нұрай Арыстанбекова Шәкәрім университетінің грантын жеңіп алды.

Айта кетсек, білім сайысында өңірлік кезеңнен өтіп, еліміздің барлық аймағынан жиналған 160-тан астам 9-11 сынып оқушылары бақ сынаған болатын.

Олимпиаданың республикалық кезеңі 2 айналымнан тұрды:

- 1 айналым – жазбаша (эссе);

- 2 айналым – ауызша.

Қатысушылар қазақ тілі мен әдебиетінің шығармалары, Қанипа Бітібаеваның өмірбаяны, ғылыми-педагогикалық мұрасы және публицистикалық еңбектері бойынша білімдерін көрсетті.