Өскемен қаласындағы дарынды балаларға арналған Жамбыл атындағы облыстық мамандандырылған мектеп-гимназия-интернатының базасында 12-14 мамыр аралығында ҚР еңбек сіңірген мұғалімі Қанипа Бітібаева атындағы қазақ тілі мен әдебиетінен республикалық олимпиада өтуде, деп хабарлайды Altainews.kz тілшісі.

ҚР Оқу-ағарту министрлігінің «Дарын» республикалық ғылыми-практикалық орталығы ШҚО білім басқармасымен бірлесе ұйымдастырған білім сайысының мақсаты - оқушылардың қазақ тілі мен әдебиеті пәнінен білімдерін тереңдету, оқушыларды ұлттық мәдениетті, дәстүрді құрметтеуге тәрбиелеу, сондай-ақ зияткерлік және шығармашылық қабілеттерін дамыту.

Өңірлік айналымнан өтіп, еліміздің барлық аймақтарынан іріктелген 200-ден астам 9-11 сынып оқушылары олимпиадада бақ сынауда.

Олимпиаданың республикалық кезеңі 2 айналымнан тұрады:

•  1 айналым – жазбаша (эссе);
•  2 айналым – ауызша.

Қатысушылар қазақ тілі мен әдебиетінің шығармалары, Қ.Бітібаеваның өмірбаяны, ғылыми-педагогикалық мұрасы және публицистикалық еңбектері бойынша білімдерін көрсетеді. 

Іс-шара барысында олимпиада қатысушыларына мәдени-танымдық бағдарлама, жетекшілерге шеберлік сыныптары ұйымдастырылады.