Ағымдағы жылдың төрт айында Зайсан ауданында 6 миллиард 174 миллион теңгенің құрылыс жұмыстары атқарылған. Бұл өткен жылғы сәйкес кезеңмен салыстырғанда 11,1 есеге артық.

Өңірлік коммуникациялар қызметінде өткен брифинг барысында Зайсан ауданы әкімінің орынбасары Нұрғайни Қабидолдина осылай деді.

Брифингте биыл Зайсан қаласында салынып жатқан 300 орындық мектептің құрылысы аяқталып, білім ордасы пайдалануға берілетіні белгілі болды. Аудан әкімі орынбасараның айтуынша, алдағы уақытта өңірде тағы бірқатар жоба жүзеге асырылмақ. Мәселен, Жарсу мектебінің жанынан спорт залы салынса, Айнабұлақ ауылында спорт модулі бой көтеретін болады. Бұған қоса, Қаратал ауылында 50 келушіге шақталған дәрігерлік амбулаторияның, Жаңатұрмыс пен Саржыра ауылдарында жаңа типтегі медпункттердің, ал Жарсуда фельдшерлік-акушерлік пункттің құрылысы басталуға тиіс.

Белгілі болғандай, биылғы «Жол жылы» аясында «Зайсан – Жаңатұрмыс» бағытындағы 12 шақырым жолға орташа жөндеу жұмыстары жүргізіліп, асфальт төселмек. Сонымен қатар Зайсан қаласының жеті көшесі мен ауылдардағы 20-ға жуық көше жолдарын қалпына келтіру жұмыстары қолға алынады деп жоспарлануда.