Елімізде геологиялық барлау жүргізетін және кендегі пайдалы қазбалардың құрамын анықтайтын арнайы зертхана құрылуы мүмкін. Бұл туралы Парламент Сенатының депутаты Шәкәрім Бұқтұғұтов айтты.

Қазіргі уақытта жер қойнауын пайдаланушылар кен үлгілерін шетелдік зертханаларға жібереді. Бұл, әлбетте, қыруар қаражат пен уақытты талап етеді. Пайдалы қазбаға бай Қазақстан үшін зертхана мәселесін жолға қоюдың стратегиялық маңызы да зор.

Сонымен қатар, сенатордың айтуынша, қазір Парламентте қолданыстағы заңнамаға өзгеріс енгізу мәселесі қаралып жатыр. Өзгерістер мақұлданған жағдайда жер қойнауын пайдаланушылар үшін және тау-кен металлургиясы мен көмірсутегіне қатысты жобалар үшін бір терезе қағидаты бойынша жұмыс істейтін орталық құрылады.

Естеріңізге сала кетейік, қазір жер қойнауын пайдаланушылар міндетті бір пайызды ғылыми-зерттеу және тәжірибелік-конструкторлық жұмыстарға аударады. Бұл қаражаттың бір бөлігі геологиялық барлауға, сондай-ақ сарқылған және тотыққан кендерді өндіру тиімділігін арттыруға бағытталуы мүмкін.