«Заң және жастар» тұжырымдамасы аясында Үлбі металлургиялық зауытының қызметкерлерімен арнайы диалог алаңы ұйымдастырылып, қазіргі қоғамдағы, әсіресе, жастар арасындағы заңбұзушылық түрлеріне қатысты өзекті мәселелер талқыланды, деп хабарлайды Altainews.kz тілшісі.

Диалог алаңына өңірдегі Полиция департаментінің, экономикалық тергеу қызметінің, облыстық прокуратураның өкілдері спикер ретінде қатысып, еңбек жолын енді бастаған жастардың оңай ақшаға құнығып,  абайсызда есірткі тасымалдаушылардың құрығына ілікпеуін, жас өмірлерін темір тордың арғы жағында өксікпен өткізбеулерін түсіндірді.
Кездесу еркін форматта, сұрақ-жауап түрінде жалғасып, зауыт қызметкерлері өз ой-пікірлерін еркін жеткізе алды.

Мамандардың айтуынша, қазіргі таңда өкінішке орай, есірткі қылмысына тартылған жастардың саны жыл сайын артып келеді. Басты себебі, оңай жолмен тезірек мол ақша табу. Ал оның тағдырына, туған-туыстарына келтіретін зардабын ойлап та жатпайды. Бұған мысал ретінде жақында ғана Өскемен көшелерінде жасырын түрде есірткі таратып жүріп ұсталған 20 жасар бойжеткеннің тағдырын айтуға болады.

Сондай-ақ, цифрлық қауіпсіздік және қоғамдағы құқықтық тәртіпті нығайтудағы жас ұрпақтың рөліне ерекше назар аударылды.

Спикерлер өмірлік тәжірибеден нақты мысалдар келтіріп, азаматтардың құқықтарын қорғаудың заманауи тетіктері туралы әңгімелеп, қойылған сұрақтарға жауап берді.

Жастар көтерілген мәселелерді талқылау барысында жоғары белсенділік танытып, өзара іс-қимылды жақсарту жөнінде пікірлері мен ұсыныстарын ортаға салды.

Фото/видео: Жалғас Сақадиев