ШҚО-да 96 мыңнан астам оқушы мектеп бітірді
Фото: ozger-is.qamshy.kz
Бүгін ШҚО-да барлық мектептерде соңғы қоңырау мерекесі салтанатты түрде өтіп жатыр. Аймақта 96383 оқушы мектеп бітірсе, соңғы қоңырау облыстың 12603 оқушысына арналып соғылады.
Түлектердің санына келсек, 9 сыныпты 8793 оқушы бітірсе, 4 мыңға жуық оқушы 11 сыныпты аяқтап отыр, деп хабарлайды Altaynews тілшісі.
Биыл оқу жылы 31 мамырда аяқталды, ал 2 маусымнан бастап 9 және 11 сынып оқушылары қорытынды емтихандарды тапсырады.
Өңірде аттестат тапсыратын салтанатты жиындар 20-22 маусым аралығында өткізіледі.
– Биыл облыста "Алтын белгіге" 281 түлек, ал үздік аттестат алуға 378 оқушы үміткер, – деп атап өтті ШҚО білім басқармасы басшысының орынбасары Динара Шаухина.
Ал жаңа оқу жылында бірінші сыныптарға биыл 9,5 мыңнан астам бала келеді деп күтілуде. Оқуға түсуге өтініштер 1 сәуірден 1 тамызға дейінгі кезеңде қабылданады.
