ШҚО-да өткен 2022 жылы"Аңсаған сәби" бағдарламасымен 212 бала дүние есігін ашқан.

Облысқа аталмыш бағдарлама бойынша ЭКҰ-ға 488 квота бөлінген болатын. Артынша оның бір бөлігі Абай облысына бөлінді, деп хабарлайды Altaynews тілшісі.

ШҚО бойынша отбасын жоспарлау және репродуктивті денсаулық жөніндегі үйлестіруші Надира Слямханова "Аңсаған сәби" бағдарламасына қатысуға шешім қабылдаған баласыз ерлі-зайыптылар үшін іс-қимыл алгоритмі және МӘМС есебінен ЭКҰ-ны қалай алуға болатындығы туралы айтып берді.

Аймақта өткен жылы бала сүйе алмаған 792 жұп тіркелген. Квота бойынша 293 жұпқа экстракорпоральды ұрықтандырудың (ЭКҰ) рәсімі жүргізіліп, 141 әйл аман-есен босанды. Қазір 122 әйел  экстракорпоральды ұрықтандырудан кейінгі жүктілік бойынша есепте тұр.

Ал, 2023 жылға 777 жұп тіркеліп үлгерген. Олардың бөлінген квотаға байланысты 239-ында "Аңсаған сәби" бағдарламасы аясында ЭКҰ алу мүмкіндігі бар. Мамандардың айтуынша, бағдарламаға кіру қиын емес.

Учаскелік дәрігер пациентті бала сүйе алмайтын диспансерлік науқастардың (ЭРДБ) электрондық регистріне енгізеді. Тиісті тексеруден өткеннен кейін 12 ай ішінде бейінді маманның қорытындысы негізінде учаскелік дәрігер МӘМС есебінен көмекші репродуктивті технологияларды жүргізу туралы мәселені шешу үшін пациенттің құжаттарын жоғары технологиялық медициналық қызметтер жөніндегі комиссияға жібереді. Оң шешім қабылданған кезде госпитализация бюросының порталында пациент құжаттардың толық пакетімен тіркеледі. Оған қызметтерді алудың күні мен уақыты айтылады.

Айта кетейік, биыл бұл қызметтерді еліміздің жеті өңірінде:  Астана, Алматы, Шымкент, Ақтөбе, Атырау, Жамбыл, Қарағанды облыстарында орналасқан 19-ға жуық медициналық ұйым МӘМС аясында тегін көрсетеді.

Егер сізде  осы бағдарлама бойынша сұрақтар туындаса, сіз емделушіге қолдау көрсету қызметіне хабарласып, өз емханаңыздан сұрай аласыз. Жергілікті мекеме көмектесе алмаған жағдайда әлеуметтік медициналық сақтандыру қорына ыңғайлы байланыс арнасы арқылы өтініш жібере аласыз. Ресми сайт: fms.kz, байланыс орталығы 1406, Qoldau 24/7 мобильді қосымшасы және Telegram-дағы SaqtandyryBot.