Облыс әкімі Даниал Ахметов Тұңғыш Президенті күні қарсаңында облыс орталығының 30 отбасына жаңа пәтерлердің кілтін салтанатты түрде табыс етті. Олардың қатарында көпбалалы отбасылар, балалар үйінің түлектері, мүмкіндігі шектеулі бүлдіршіндерді тәрбиелеп отырған жанұялар, сондай-ақ Ауған соғысының ардагерлері және басқа да әлеуметтік топ өкілдері бар.

Жаңа қоныс иелерінің қатарында облысымыздың мақтаныштары – Паралимпиада ойындарының жеңіл атлетикадан екі дүркін чемпионы Ольга Демченко, "Үміт" балалар үйінің тәрбиеленушісі, әнші, республикалық және халықаралық конкурстардың жеңімпазы Владислав Лоскутов та бар. Баршаға өз ризашылығын білдірген Ольга Демченко көршілерін жаңа қоныспен құттықтады. 

– Баршаңызды Қазақстан Республикасының Тұңғыш Президенті күнімен шын жүректен құттықтаймын! Осындай жарқын мерекеде баспаналы болып жатқан барлық отбасыларға береке-бірлік тілеймін. Отбасын құру, болашақ ұрпақты тәрбиелеу – әрқайсымыздың басты жетістігіміз. Біздің өміріміздің мәні болған осы бір міндетті орындау басты мақсатымыз. Баршаға зор денсаулық пен бақ-береке тілеймін! Жаңа үй бақыт пен молшылыққа, қуаныш пен балалардың күлкісіне толы болсын! Қоныстарыңыз құтты болсын!, – деді Даниал Ахметов.

Ал балаларымның арманы енді орындалды деген төрт баланың анасы Меруерт Мұқұшева қуанышын жасырмады. 

– Бүгін біздің жанұямыз үшін қуанышты күн. Көптен күттік. Мемлекеттік бағдарлама арқасында өз пәтерімізге қол жетті. Қолдау көрсеткен Елбасымызға, Президентімізге зор алғыс білдіремін, – деді көпбалалы ана Меруерт Мұқұшева.

Айта кетейік, биыл 200-ден астам отбасы «Жалдамалы тұрғын үй», «Бақытты отбасы» бағдарламалары аясында аталған көпқабатты тұрғын үйден өз баспаналарына қол жеткізді.