Өскеменде төбелескен қыздардың мұндай жаға ұстатарлық әрекетке не үшін барғаны белгілі болды.

Жасөспірім қыздардың арасында жанжал жігіт үшін туындаған көрінеді. Бұл туралы Өңірлік коммуникациялар қызметінде өткен баспасөз брифингінде ШҚО білім басқармасының басшысы Инесса Чернышева айтты, деп хабарлайды Altaynews тілшісі.

Осы уақытқа дейін облыстық прокуратураның деректеріне сәйкес, оқиғаға қатысы бар 8 адам анықталған. Алайда ШҚО ПД жергілікті полиция қызметі басқармасы бастығының орынбасары Шамиль Джинлосанов қазіргі уақытта зардап шегушіні қосқанда 7 адамның анықталғанын атап өтті.

Ал әлеуметтік желіде тараған ақпарат бойынша қыздардың қоқан-лоқы көрсетіп, ақша талап ету фактілері анықталмаған.

Өзінің құрдастарынан соққы жеген қыз қазір білім алуын жалғастырып жатыр, ал төбелескіш қыздардың кейбірі қашықтан оқыту форматына ауыстырылған.

Осы орайда айта кету керек, оқиға 1 наурыз күні орын алып, 4 наурыз күні тергеу жұмыстары басталып кеткен екен.  Ал арада 1 ай уақыт өткеннен кейін бейнежазбаны кімнің таратқаны әлі де белгісіз қалып отыр.

Қазіргі уақытта ҚР Қылмыстық кодексінің 293-бабының 2-бөлігі (бұзақылық) бойынша сотқа дейінгі тергеп-тексеру жұмыстары жалғасуда. Аталған бапта үш жылдан жеті жылға дейінгі мерзімге бас бостандығын шектеу не сол мерзімге бас бостандығынан айыру жазасы көзделген.