Парижде өткен Олимпиада ойындарында жеңіс тұғырынан көрінбесе де, жүлдеге қол созым жерден тоқтауға мәжбүр болған спортшыларымыз аз емес. Соның бірі – жерлесіміз Руслан Курбанов.

Франция астанасында шығысқазақстандық шпагамен семсерлесу өнерінің шебері Курбанов жекелей сында да, командалық сайыста да алтыншы орыннан көрінді. Бұл – әзірге отандық семсерлесу тарихындағы ең үздік нәтиже. Жекелей сында Курбанов ширек финалға дейін іркілмей жетіп, болашақ Олимпиада чемпионы, жапониялық Коки Каноға ғана есе жіберген болатын. Бір атап өтерлігі, жарыстың 1/8 финалында өскемендік спортшы Токио Олимпиадасының чемпионы Ромен Каннонды (Франция) жеңіп, сенсация авторы атанған-ды. Ал командалық сайыста құрамында шығысқазақстандық Руслан Курбанов пен Вадим Шарлаимов сынды спортшылары бар Қазақстан құрамасы шешуші кездесуде Италия құрамасына жол беріп, алтыншы орынды қанағат тұтты. 

Ал енді кейіпкеріміз туралы аз-кем сөз саптасақ. Руслан Курбанов 1991 жылы Өскеменде дүниеге келген. Семсерлесуден халықаралық дәрежедегі спорт шебері. Ұлттық құраманың мүшесі. 2021 жылы Токиода өткен XXXII жазғы Олимпиада ойындарына қатысып, қорытынды есепте 12-ші орынды місе тұтқан. Бұған қоса ол Әлем кубогында алтын, Әлем чемпионатында қола жүлдені иеленген, 19-шы Азия ойындарында күміс жүлдегер атанған. Курбанов Әлем кубогы мен Азия чемпионатының бірнеше дүркін жүлдегері, Қазақстан чемпионатында да сан мәрте жеңіс тұғырына көтерілген.

Айта кетейік, Олимпиада қарсаңында Кувейтте өткен Азия біріншілігінде семсерлесуден еліміздің ерлер командасы финалда Жапония спортшыларын жеңіп, құрлық чемпионы атанған болатын.