Шаруашылықтарының тасын өрге дөңгелентуді ойлаған өңірдегі шаруалар «Бизнестің жол картасы 2020» бағдарламасы аясындағы «Аға сеньор» жобасын тиімді пайдаланып, елордалық сарапшылардың кеңестеріне құлақ асуда.

Осындай шаруа қожалықтарының бірі Ұлан ауданының Привольное ауылында орналасқан «Б-Агро» ЖШС-і. Шаруашылық иесі Данил Воропай узақ уақыттан бері дәнді-дақылдардың тұқымдарын, өсімдіктерге арналған химиялық құралдар, құрылғы тасымалдаумен, сондай-ақ топырақ қабатына агрохимиялық зерттеу жүргізумен айналысады. Шаруашылықтың ісі ілгерлеп тұрғанымен ұжымның сауда, келіссөз жүргізудегі машығын одан әрі дамытуды ойластырған шаруа «Атамекен» ҰКП-нің облыстық филиалына жүгінген. Кәсіпкерлер палатасының қызметкерлері оған «Бизнестің жол картасы 2020» бағдарламасының «Аға сеньор» компонентін қолдануды ұсынды. Керек құжаттар ресімделіп болған соң, Привольноеға Нұр-Сұлтан қаласынан Қуат Төлейханов есімді сарапшы келіп, компания жұмысшыларын сауданың қыр-сырына үйретті.

– Шаруашылығымыздың сату бөліміндегі жұмыстарды қайтадан ұйымдастыру қажеттігі туындады. Атап айтсақ, бүгінде қолданылып отырған сауда-саттық жүйесін аудиттеп, бөлімдегі қызметкерлердің келіссөз жүргізу машықтарын одан әрі дамыту, қызметкерлерді тапсырыс берілгеннен келісімге келгенге дейін клиентімізді қолдауға үйрету басты мақсатымыз болды. Оқу барысында мамандарымыз көп нәрсені білді. Клиенттермен жұмыс істеу барысын үйрендік. Болашақта алған біліміміздің көмегі көп болады деп ойлаймын, – деді Данил Воропай.

Елордалық кәсіби сарапшы курсты тоғыз модуль бойынша бөліп оқытты. Оқу барысында сауда-саттықтың бес қадамы, клиенттердің психотиптерімен жұмыс істеу, мотивациялар, команданы жасақтау, компанияның құндылықтары, стартегия, мақсаттар мен жоспарлар сияқты бағыттар қамтылды.

Аймақтық кәсіпкерлер палатасы «Аға сеньор» жобасының осы сияқты тағы үш жобасын жыл соңына дейін іске асырмақ ниетте.