Мадридтік «Реал» «Вильярреалды» жеңіп, Испания чемпионы атанды, деп хабарлайды Алтайньюс тілшісі.

37-турдың кездесуі «Реалдың» қосалқы стадионында өткен. Матч 2:1 есебімен аяқталды. Алаң иелері сапында Карим Бензема дубль жасады – ол 29 минутта есеп ашып, 77-минутта пенальтиден мүлт кетпеді. Ал «Вильярреал» сапында 83-минутта Висенте Иборра көзге түсті. 

Осылайша, «Реал» 86 ұпай жинап, чемпионаттың бітуіне бір тур қалғанда Испания чемпионы атанды. Мадридтік клуб мұндай атақты 34-рет иеленіп отыр. 

«Реал Мадрид» Испания чемпионатында соңғы рет 2016/17 жылғы маусымда топ жарған болатын. 

Айта кетейік, 79 ұпаймен екінші орында келе жатқан «Барселона» 37-турда өз алаңында «Осасунаға» 1:2 есебімен жол берді.