Мәдениет және спорт министрлігінде халықаралық жеңіл атлетика федерациялары қауымдастығының (IAAF) президенті Себастьян Коэмен кездесу өтті. Оған министр Ақтоты райымқұловамен бірге Қазақстанның жеңіл атлетика федерациясының президенті Даниал Ахметов, вице-министр Елдос Рамазанов, ұлттық құраманың бас жаттықтырушысы Дмитрий Карпов және Олимпиада чемпиондары Ольга Шишигана мен Ольга Рыпакова қатысты.

– Қазақстан жеңіл атлетикасының өзіндік тарихы бар. Біршама жетістіктерге жетті. Халықаралық дәрежеде спорт саңлақтарын тәрбиелеп шығара алды. Қазіргі таңда елде жеңіл атлетика түрлерімен айналысатын 25 мыңдай адам, 2 500-дей жаттықтырушы бар. Сондай-ақ төрт жеңіл атлетика манежі, бір стадион салынған, – деді Ақтоты Райымқұлова.

Қауымдастық президенті Қазақстанның әлемдік жарыстарға дайындығын оң бағалап, қазіргі жеңіл атлетикадағы тенденциялар жайында сөз қозғады.

– Қазір халықаралық дәрежедегі спорт шеберлерін дайындауда бұрынғыдан бөлек, жаңа жүйеге көштік. Осыған байланысты спортшылардың жарысқа таза, әділ қатысуына, жаттықтырушылардың ойлау жүйесін жаңғыртуға күш салып жатырмыз, – деді Себастьян Коэ.

Айта кету керек, республикада жеті жеңіл атлетика манежін салу және Нұр-Сұлтанда халықаралық жеңіл атлетика федерациялары қауымдастығының аймақтық дамыту орталығын ашу жоспарланған.