Республикалық жеңіл атлетика федерациясына Азия жеңіл атлетика қауымдастығынан құттықтау хат келіп түсті. Онда Қазақстан ұлттық құрамасы мен «Altay Athletics» клубының беткеұстар спортшысы Ольга Рыпакованың құрлықтық қауымдастық комиссиясына мүше ретінде қабылданғаны туралы айтылған, деп хабарлайды Алтайньюс тілшісі.

Облыстық денешынықтыру және спорт басқармасының баспасөз қызметі ұсынған ақпаратқа сенсек, бұл комиссияға Рыпаковадан бөлек тағы бес адам мүшелік етеді екен. Олар: комиссия төрағасы Андрей Абдувалиев (Өзбекстан), Ван Ю (Қытай), П.Т.Уша (Үндістан), Ли Хуп Вэй (Малайзия) және Саад Шаддад (Сауд Арабиясы).

Хатта жерлесімізді құрлықтық жеңіл атлетика қауымдастығының төрағасы Дахлан Әл-Хамадтың атынан ұйымның бас хатшысы A.Шуггумарран құттықтаған.

– Сіздің біліктілігіңіз бен тәжірибеңіз Азия құрлығының жеңіл атлетикасын өрге сүйреуге көмектесетініне сенімім мол, – делінген хатта.

Бұл ретте Ольга Рыпакова құрлықтық қауымдастыққа жұмысқа шақырылған алғашқы жерлесіміз емес екенін атап өткен орынды. Осыдан біраз бұрын өткен ұйымның 93-ші кеңесінде Қазақстан жеңіл атлетика федерациясының бас хатшысы Асхат Сейсембеков жарыстар ұйымдастыру жөніндегі комиссияның мүшесі ретінде қабылданған болатын.