Аймақ басшысы Даниал Ахметов мешітте жақын арада ашылатын Ислам мәдениетінің мұражайына арналған ғимаратты өарап, оның құрылу концепциясымен танысты, деп хабарлайды Алтайньюс тілшісі.

Ислам мәдениетінің мұражайында исламның пайда болуы мен даму тарихы көрсетіледі. Ол үш блоктан құрылған: тәңіршілдік, исламның Қазақстан аумағында пайда болуы мен таралуы, қазіргі кездегі ислам. Мұнда Балбал тастардың, Күлтегін мен сақ қорғандарының инсталляциялары, исламға дейінгі кезеңдегі археологиялық жәдігерлер, жартастағы суреттердің үлгілері қойылады.

Сондай-ақ, мұражайда Қазақстанның түрлі дәуірлеріндегі киім-кешектердің үлгілері, 100-200 жылдық тарихы бар сирек қордың кітаптары, Қазақстандағы мешіттер мен Каабаның макеттері  де ұсынылады. Мұражайдың ортасына үш тілде (қазақ, орыс, араб) жазылған электронды Құран орнатылады. Ол келушілерге интерактивті режимде таныстырылады.

Мұражайдан Шығыс Қазақстанның ғана емес, Шымкент қаласы, Түркістан облысы сияқты басқа да аймақтардың сирек жәдігерлер топтамасын да тамашалауға болады. Мұндай мұражайдың республикада баламасы жоқ екенін айта кету керек.

Болашақ мұражайдың құру жұмыстарымен танысқаннан кейін Даниал Ахметов ораза ұстап жүрген мұсылмандарға арнап ауызашар берді. Оған дін және этномәдени бірлестіктерінің өкілдері, ақсақалдар мен мешітке келушілер қатысты.