Өскемен қалалық мәслихат депутаттары Тәуелсіздік даңғылын Нұрсұлтан Назарбаев атымен атау жайында жиын өткізді, деп хабарлайды Алтайньюс тілшісі.

- Президент Қасым-Жомарт Тоқаев үлкен қалалардағы орталық көшелерге Тұңғыш Президент атын беруді ұсынды. Ұсынысқа сәйкес бізге қаладағы төрт ұжымнан хат келіп түсті. Олар: "Қазцинк" қызметшілері, облыстық аурухана дәрігерлері, мұғалімдер және қоғамдық кеңес мүшелері. Аталмыш ұжымдардың хатында Тәуелсіздік даңғылына Нұрсұлтан Назарбаев атын беру жайы айтылған, - деді Өскемен әкімі Жақсылық Омар.

Бұл ұсынысты жиынға келген халық қалаулылары бір ауыздан қолдады.

- Біз осы тарихи сәтке куә болғанымызға қуаныштымыз. Мемлекетімізді құрған Елбасына алғыс! Мен жас депутат ретінде осы ұсынысты қолдаймын, - деді депутат Ринат Ахмеджанов.

Жиында жергілікті өзін-өзі басқару кеңесінің төрағасы Серік Оразбайұлы да өз ұсынысын ортаға салды.

- Бүгін, шынында, тарихи сәт. Осы сәтке куә болғанымызға қуанамыз. Жан-жақтан келген ұсыныстарды қолдай отырып, өзім де бір ұсынысты қоса кеткім келеді. Ендігі жерде Нұрсұлтан Назарбаев даңғылы деп аталатын даңғыл бойында мрамордан тақта қойылып, онда "Нұрсұлтан Назарбаев - Тұңғыш Президент" деп жазылып тұрса нұр үстіне нұр болар еді, - деді С.Оразбайұлы.