Мотоатқыштар батальонында тактикалық оқу-жаттығуы өтті - ШҚО
«Шығыс» өңірлік қолбасшылығына қарасты 27943 әскери бөлімінде батальондық тактикалық топтармен оқу-жаттығу өтті.
Батальондық тактикалық топтармен оқу-жаттығудың басында әскери бөлімдер мен бөлімшелер дабыл бойынша көтеріліп, жауынгерлік мақсаттағы ауданға штаттық техникамен марш жасады, деп хабарлайды Altaynews тілшісі.
Сондай-ақ әскери қызметшілер жергілікті жерге орнығып, даладағы жұмыс орындарын пысықтаған. Артынша батальон құрамы жауынгерлік оқ ату жұмыстарында өздерін сынап көрген.
– Қазір жауынгерлік дайындық жоспарына сәйкес, 27943 әскери бөлімінің жауынгерлік дайындығын жетілдіру мақсатында оқу-жаттығу жиынын өткізіп жатыр. Біз бүгін жеке құрамның жауынгерлік жағдайдағы далалық дағдысы, бекітілген орынға уақтылы жиналуын тексердік. Ел Президенті – Қарулы Күштердің Жоғарғы Бас қолбасшысының талаптары негізіндегі міндеттерді жеткіздік, – деді 27943 әскери бөлімі командирінің жауынгерлік даярлық жөніндегі орынбасары подполковник Марат Бралинов.
Оқу-жаттығуға 200-ден астам әскери қызметші және 50-ге жуық әскери техника мен қару-жарақ тартылған.
– Мұндай оқу-жаттығудың біз үшін берері көп. Себебі жеке құрам кез келген жағдайға даяр, жауынгерлік тапсырмаларды сенімді орындап, сергек болуы тиіс, – деп атап өтті кіші сержант Болат Мирас.
Оқу-жаттығу жиыны нәтижесінде өздерінің жоғары кәсіби біліктіліктерін көрсетіп, ерекше көзге түскендер алғыс хаттармен марапатталды.
Оқи отырыңыз
