Шығыс Қазақстан облысында Оңалту орталығының үздік мамандары анықталды.

Облыстық білім басқармасының «Шығыс» өңірлік орталығы «Оңалту орталығының, психологиялық-педагогикалық түзету кабинетінің үздік педагогы» және «Психологиялық-медициналық-педагогикалық консультацияның үздік маманы» атты республикалық байқаудың облыстық кезеңін онлайн форматта өткізді, деп хабарлайды Altaynews тілшісі. 

Қатысушылардың жұмысын қазылар алқасы бағалады. Соның нәтижесінде «Оңалту орталығының, психологиялық-педагогикалық түзету кабинетінің үздік педагогы» байқауында «Үздік әдістемелік кейс» аталымын Ұлан ауданының психологиялық-педагогикалық түзету кабинетінің дефектологы Нұргүл Кабиева иеленді. Ал «Үздік сабақ» аталымына Шемонаиха ауданының психологиялық-педагогикалық түзету кабинетінің логопед-мұғалімі Олеся Бычкова лайық болды.

«Психологиялық-медициналық-педагогикалық консультацияның үздік маманы» байқауында «Отбасына үздік кеңес беру» аталымын Алтай ауданының «Психологиялық-медициналық-педагогикалық консультация» мекемесінің дефектолог-мұғалімі Елена Шматова жеңіп алды.

Жеңімпаздар білім басқармасының І, ІІ, ІІІ дәрежелі дипломдарымен марапатталып, сетификаттарға ие болды.

Байқаудың облыстық кезеңінің бірінші орын иегерлері республикалық кезеңге қатысуға жолдама алды.