Марқакөл ауданы мамық қарға оранып жатыр. Өйткені бес жарым күн бойы тоқтаусыз қар жауған. Төсқайыңға апарар жолдағы қардың қалыңдығы 2 метр шамасында.

Қалың қардың құрсауында қалған ауылдың жолы 12 күннен кейін ашылған. Оқуға бара алмай қамалып жатқан студенттер мен азық-түлік әкелуге шыққан тұрғындар күні кеше қалаға қарай жол тартты, деп хабарлайды Altaynews.kz тілшісі.

Төсқайыңға барар жолдың көп бөлігі бір бағытта ғана. Сондықтан да алдыңнан қарсы шыққан көлікке жол беріп отыруың керек. Сол үшін жол тазалаушылар әр жерден көлік тұрағын шығарып кеткен. Біз бара жатқанда жол тазалушылар түнімен жұмыс істеп жүрді. Ал қайтқанда жолды екі қатар қылып аша күрей бастады. Ауыл 12 күн бойы қар құрсауында жатса да азық-түлік тапшылығы болмаған. Өйткені бұл жақтың халқы азық-түлікті бір барғанда молынан әкеліп алады екен.

Иә, 530 шақырым алыстағы ауылда тұратын халық қыстың қамын артығымен жасап алуы заңдылық. Жұрт тек қатал қыс биыл малға қауіп төндіріп тұрғандығына алаңдаулы екен.

 Фото: Данияр Сағидолдин