Қызметтік әдеп нормаларын сақтау – мемлекеттік қызметшінің жалпы міндеті. Десе де өзіне жүктелген бұл міндетті лайықты атқара алмай жүрген қызметкерлер де жоқ емес.  

Мәселен, 2023 жылы әлеуметтік желілерге жүргізілген мониторинг барысында мемлекеттік қызметтің имиджіне нұқсан кетіретін жеті жағдай анықталған. Сонымен қатар жол ережесін бұзған 41 мемлекеттік қызметкер әкімшілік жауапкершілікке тартылған, деп хабарлайды Altaynews.kz тілшісі.

Бұл туралы мемлекеттік қызметшілердің қызметтік әдеп нормаларын сақтау бойынша қорытындысында белгілі болды. ШҚО әкімі аппаратының есебіне аппарат басшысы Ербол Нұрғалиев, Мемлекеттік қызмет істері агенттігі ШҚО бойынша департаментінің басшысы – Әдеп жөніндегі кеңес төрағасы Нұрлан Еркебаев және әр ауданның әдеп жөніндегі уәкілдері қатысты.

Әдеп жөніндегі кеңес хатшылығы бірқатар талдау жүргізген. Нәтижесінде мемлекеттік органдардың кемшіліктері мен қызметшілердің құқығы бұзылғандығы анықталған. 

Шара соңында мемлекеттік органның имиджін қалыптастыруға үлес қосқан әдеп жөніндегі уәкілдерге алғыс хат табысталды.