«Жайлы мектеп» ұлттық жобасы: жаңа форматтағы білім ордалары салынуда
«Жайлы мектеп» ұлттық жобасының іске асырылу барысы облыс әкімдерінің орынбасарлары, білім басқармалары басшылары, орталық мемлекеттік органдардың және құрылыс операторы «Samruk Kazyna Construction» АҚ өкілдерінің қатысуымен өткен кеңесте талқыланды,- деп хабарлайды Altainews.kz тілшісі ҚР Оқу-ағарту министрлігіне сілтеме жасап.
Мемлекет басшысының тапсырмасымен қолға алынған бұл жоба аясында 2026 жылға дейін 460 мың оқушыға арналған 217 жаңа мектеп салу жоспарланған.
2024 жылдың қорытындысы бойынша 254 мың оқушы орнына арналған 105 мектептің құрылысы аяқталды. Жобаны жүзеге асыруда білім беру ортасының функционалдығы мен қауіпсіздігіне ерекше көңіл бөлінген. Мектептерде бастауыш және жоғары сынып оқушыларына арналған жеке блоктар қарастырылған. Сондай-ақ, заманауи техникалық құралдарды енгізу арқылы қауіпсіздік шаралары күшейтіліп, ерекше білім беру қажеттіліктері бар балалар үшін кедергісіз орта құрылуда. Ұлттық жоба шеңберінде мектептер заманауи пәндік кабинеттермен толық қамтамасыз етілмек,- делінген министрлік хабарламасында.
Фото: Махаббат Ахметжанова
Оқи отырыңыз
