«Қазгидромет» ШҚ филиалының мәліметінше, түнде облыстың солтүстігі мен шығысында жаңбыр мен қар күтілуде. Кей жерлерде жауын-шашын қарқынды болуы мүмкін. Сондай-ақ түнгі және таңғы уақыттарда тұман түсіп, көріну қашықтығы күрт төмендеуі ықтимал, деп хабарлайды Altainews.kz тілшісі.

Солтүстік-батыстан соғатын желдің екпіні әсіресе облыстың оңтүстігі мен шығысында 15-20 м/с-қа дейін жетеді. Ауа райы айтарлықтай құбылмалы болмақ: түнде 0-ден 5 градусқа дейін жылылық күтілсе, шығыста үсік жүріп, температура 3 градусқа дейін төмендеуі мүмкін. Күндіз өңірдің басым бөлігінде 12-17 градус, ал шығысында бар болғаны 7 градус жылы болады.

ШҚО Төтенше жағдайлар департаменті тұрғындарды барынша сақ болуға шақырады:

Жолда көлік жүргізген кезде жылдамдық режимі мен арақашықтықты қатаң сақтаңыз;

Күшті жел кезінде электр сымдарына, жарнамалық қалқандар мен басқа да тербелмелі құрылымдарға жақындамаңыз;

Автобус аялдамаларының артында, ағаштардың түбінде тұрудан сақ болыңыз;

Балаларды далада жалғыз қалдырмаңыз.

Ауа райына байланысты кез келген өзгеріс туралы ақпаратты "Дәрмен" мобильді қосымшасы арқылы біліп отыруға болады. Ал егер төтенше жағдай орын алса, "112" нөміріне дереу хабарласу қажет.