Шығыс Қазақстан облысында биыл ветеринариялық қызметтің материалдық-техникалық базасын жүйелі түрде жаңарту жұмыстары басталады, деп хабарлайды Altainews.kz тілшісі.

Бұл бағыттағы ауқымды жаңартулар соңғы 12 жылда алғаш рет жүзеге аспақ. Атап айтқанда, ауылдық ветеринариялық пункттерге арналған қызметтік автокөліктер жаңартылып, 100-ден астам машина жеткізу жоспарланған. Бұл туралы ШҚО Ветеринария басқармасының басшысы Рамиль Сағандықов мәлімдеді.

2025 жылы облыста ветеринариялық қауіпсіздікті қамтамасыз етуге 1,9 миллиард теңге бөлінген. Оның ішінде 470 миллион теңге республикалық бюджеттен трансферт түрінде қарастырылған. Бұдан бөлек, бірнеше жылдан бері алғаш рет ветеринариялық қызметке техникалық және көліктік жаңғырту жұмыстары кең көлемде жүргізіледі.

Жоба аясында ауылдық және коммуналдық ветеринариялық пункттерге бес жыл мерзімге лизинг арқылы 112 бірлік қызметтік автокөлік сатып алынады. Жаңа көліктер тоңазытқыш жабдықтармен және ветеринариялық құралдармен жабдықталып, мамандарға шалғай ауылдардағы жұқпалы ауру ошақтарына жедел жетіп, сапалы алдын алу шараларын жүргізуге мүмкіндік береді.

Сонымен қатар, материалдық-техникалық базаны нығайту шеңберінде мынадай арнайы техника түрлері сатып алынады:

• мал шаруашылығы нысандарын дезинфекциялау, дезинсекциялау және дератизациялауға арналған 13 бірлік арнайы көлік;

• аса қауіпті аурулардан қырылған малды жоюға арналған жылжымалы кешендер;

• ветеринариялық препараттарды салқын тізбекпен тасымалдайтын рефрижератор;

• ауырған малды арнайы сою пункттеріне жеткізуге арналған көліктер.

Рамиль Сағандықовтың айтуынша, бұл шаралар эпизоотиялық қауіп-қатерді азайтуға және биологиялық қауіпсіздікті арттыруға бағытталған тиімді әрі мобильді ветеринариялық жүйе құруға мүмкіндік береді.

Жалпы, ветеринариялық қызметтің материалдық-техникалық базасын жаңарту – бұл тек инфекциялық қауіптерден қорғану ғана емес, сонымен қатар азық-түлік қауіпсіздігіне, ауыл шаруашылығының орнықты дамуына және өңірдің экспорттық әлеуетіне салынған маңызды инвестиция болып саналады.

Дамир Омаров