Өскемен қаласында Самар тас жолының бойында орналасқан Шешек асуында жаңа демалыс аймағының құрылысы аяқталуға жақын. Жаңа рекреациялық кешен қала тұрғындары үшін жайлы серуен аймағына айналып қана қоймай, туристер үшін де тартымды нысан болмақ, деп хабарлайды Altainews.kz тілшісі.

Бұл жоба туралы биылғы сәуір айында өткен брифингте Өскемен қаласының әкімі Алмат Ақышов мәлімдеген болатын.

Сол уақыттан бастап асуда құрылыс жұмыстары басталған.

Қазір аталған демалыс орнының құрылысы аяқталу сатысында тұр. Қала әкімінің орынбасары Абзал Маулетхановтың айтуынша, аумақта автотұрақтар, мангал алаңдары мен жаяу жүргіншілер жолы салынған. Сонымен қатар, екі күрке мен 40 дана қоқыс жәшігі бар орындықтар орнатылған. Қазір воркаут аймағы мен қарау алаңын салу жұмыстары аяқталуға жақын. Бұған қоса, бір модульді дәретхана (септик дайын), екі ағаштан жасалған бір орынды әжетхана, балалар алаңы және қоқыс контейнерлері орнатылады.

ШҚО әкімі Нұрымбет Сақтағановтың айтуынша, Шешек – қаладан тыс жердегі ең танымал демалыс орындарының бірі.

Фото: Махаббат Ахметжанова