Өскемен қаласында соңғы жылдары абаттандырылған қоғамдық кеңістіктердің бірқатары қазір жөндеуді қажет етеді. Қалалық әкімдік бұл орындардың барлығы бақылауда екенін айтып, бюджеттен қаражат бөлінуіне қарай қалпына келтіру жұмыстары жүргізілетінін мәлімдеді, деп хабарлайды Altainews.kz тілшісі.

Мәселен, Назарбаев даңғылы, 77 мекенжайындағы бұрын бос жатқан аумақта салынған сквер кезінде балалар мен ересектерге арналған демалыс аймағына, спорттық алаң мен «Шаңырақ» атты сәулеттік нысанға айналған болатын. 2020 жылы бұл орын қала тұрғындарына ресми түрде таныстырылған еді.

Алайда бірнеше жыл белсенді пайдаланылған соң мұндағы шағын сәулеттік формалар мен жабдықтардың көркі қашып, кейбір бөліктері істен шыққан. Қоршаулар қисайып, ал «Шаңырақ» мүсіні тот басқан. Жаңа орын қазір бейберекет қолдану мен уақыттың әсерінен тозған, көңіл қынжылтарлық көрініске айналды.

Қалалық әкімдіктің мәлімдеуінше, бұл жағдай назардан тыс қалмаған. Қала әкімінің орынбасары Абзал Маулетхановтың айтуынша, аталған скверді жөндеуге қажетті сметалық құжаттама дайын. Былтыр мұнда жарықтандыру жүйесі жаңартылған, ал биыл абаттандыру жұмыстарын жүргізу жоспарланған.

Оның айтуынша, жаңадан салынған скверлер мен алаңдарды кепілдік мерзімі аясында құрылыс мердігерлері өз есебінен қалпына келтіріп отырады. Мысалы, Шәкәрім даңғылы, 183 үй маңындағы скверде орнатылған әткеншектер жоғалып кеткен.

Өскемендегі демалыс орындары - тек сән-салтанат емес, қала мәдениетінің айнасы. Қоғамдық кеңістіктердің тозуы тек уақыттың емес, тұрғындардың жауапсыздығының да салдары екенін ұмытпаған жөн. Әкімдік бұл бағыттағы жұмыстарды жүйелі жалғастыруға ниетті, ал тұрғындардан тек ұқыпты қатынас талап етіледі. Себебі ортақ игілік ортақ жауапкершіліктен басталады.

Фото: Елизавета Седых