Облыс әкімі Ермек Көшербаев Өскемендегі нысандарды аралау барысында Новаторлар көшесіндегі №2, 4 және 6 үйлердің арасында орналасқан жаңа саябақта болды, деп хабарлайды Altainews.kz тілшісі.  

Бұл абаттандырылған бұрыш қазірдің өзінде барлық жастағы қала тұрғындарының танымал демалыс орнына айналған. Осы жерде жастар да, балалы аналар да, аға буын өкілдері де уақыттарын тиімді өткізеді.

Алаң – жайлы әрі заманауи қоғамдық кеңістіктер құруға бағытталған қаланы абаттандыру бағдарламасының бір бөлігі. Биыл Өскеменде бірнеше ірі жоба жүзеге асса, соның бірі – Новаторлар көшесіндегі демалыс алаңы. Әкім мұндай нысандардың салынуы азаматтардың өмір сүру сапасын жақсартуда шешуші рөл атқаратынын және жайлы қалалық ортаның қалыптасуына ықпал ететінін атап өтті.

Бұл аумақта бұған дейін саябақ болмаған. Тұрғындар осы жердің серуендеп, демалуға өте ыңғайлы екенін атап өтіп, жаңа саябақты бағалап үлгерді.

 Фото: Махаббат Ахметжанова