Өскемен қаласында тұрғындар арасында «Үздік аула – 2025» байқауы өтеді. Бұл бастама аулаларды абаттандыру жұмыстарын жандандырып, кондоминиум нысандарын басқарушы құрылымдардың белсенді өкілдерін ынталандыруға бағытталған, деп хабарлайды Altainews.kz тілшісі.

Қалалық әкімдіктің мәліметінше, байқау үш кезеңнен тұрады: өтінім қабылдау, материалдар жинау және қорытынды шығару. Өтінімдерді қабылдаумен аумақтық басқарма орталықтарының филиалдары айналысады.

Байқау мынадай номинациялар бойынша өтеді:

• Үздік аула;

• Үздік МИБ;

• Үздік ҚС;

• Үздік ПИК.

Қазылар алқасы аумақтың абаттандырылу деңгейіне, кіші архитектуралық формалар мен алаңшалардың жай-күйіне, көгалдандыру мен тазалыққа, шарттар мен есептіліктің болуына, сондай-ақ қысқы маусымға дайындыққа ерекше назар аударады.

Байқау жеңімпаздарын марапаттау рәсімі 2025 жылғы 16 желтоқсанда өтеді.

Қосымша сұрақтар бойынша 8 (7232) 74-14-51 нөміріне хабарласуға болады.

Айта кетейік, бұл байқау тұрғын үй қорының күтімі мен қызмет көрсету сапасын арттыруға, қала келбетін көркейтуге және үздік тәжірибелерді кеңінен таратуға бағытталған.

Елизавета Седых