Шығыс Қазақстанда биыл мемлекеттік орман қоры аумағында 14 орман өрті болған. Жалпы ауданы 183 гектарды құраған өрттерден келген шығын 1 миллион 339 мың теңгеден асты, деп хабарлайды Altainews.kz тілшісі.

Бұл туралы ШҚО орман шаруашылығы және жануарлар дүниесі аумақтық инспекциясы мәлімдеді. Ведомствоның мәліметінше, орман өрттерінің негізгі себептері — найзағай. Сонымен қатар адам факторынан туындаған өрт жағдайлары да тіркелген.

Мамандар орманның маңызына ерекше тоқталды. Орман – оттегі өндіретін, топырақты су және жел эрозиясынан қорғайтын, құрғақшылық пен ыстық желдердің әсерін төмендететін аса маңызды табиғи қор. Ал өрттерді сөндіруге қомақты қаражат жұмсалады, тілсіз жаудан орман жануарлары мен құстары қырылып жатады.

Елизавета Седых