Мемлекет басшысының тапсырмасына сәйкес, 2025 жылдан бастап Қазақстанда қосымша білім беру ұйымдарына ваучерлік қаржыландыру жүйесі кезең-кезеңімен енгізілуде, деп хабарлайды Altainews.kz сайтының тілшісі Қазақстан Республикасы Оқу-ағарту министрлігіне сілтеме жасап.

Біріңғай мемлекеттік тапсырысты орналастырудың пилоттық жобасы қазіргі таңда Астана, Ақтөбе, Атырау, Қарағанды, Қызылорда және Шымкент қалаларында іске асырылуда. Жобаның негізгі мақсаты – оқушыларды шығармашылық, спорттық және білім беру бағытындағы тегін үйірмелер мен секциялармен кеңінен қамту.

Қаржыландыру «бір бала – бір ваучер» қағидаты бойынша жүзеге асырылады. Мұндай тәсіл барлық оқушылар үшін тең мүмкіндік жасап, жүйенің ашықтығын қамтамасыз етеді. Сонымен қатар, бюджет қаражатының мақсатсыз пайдаланылуына жол бермейді.

Айта кетейік, жоба Оқу-ағарту, Мәдениет және ақпарат, Туризм және спорт, сондай-ақ, Жасанды интеллект және цифрлық даму министрліктерінің бірлесуімен іске асырылуда.