Шығыстың ветеринарларына қызметтік көліктер мен арнайы техникалар берілді
Шығыс Қазақстанда ветеринария саласындағы қауіпсіздік жүйесі күшейтілуде – Өскеменде облыстың ветеринарларына қызметтік көліктер мен арнайы техникалардың кілттері табыс етілді, деп хабарлайды Altainews.kz тілшісі.
Мемлекет тарапынан ауыл шаруашылығы саласын қолдау мақсатында аймақ басшысының тікелей тапсырмасы бойынша өңірге 131 қызметтік көлік сатып алынды. Бұл көліктер ауылдық жерлерде жұмыс істейтін мал дәрігерлерге арналған. Ауыл шаруашылығы министрінің айтуынша, мұндай қолдаулар өңірлік бөлімшелердің материалдық-техникалық базасын нығайтып, қызмет тиімділігін арттыруға бағытталған.
Шығыс Қазақстан облысының әкімі Нұрымбет Сақтағанов өңірде ветеринариялық инфрақұрылымды одан әрі нығайту жалғасатынын атап өтті. Бүгін «Газель» базасындағы 13 дезинфекциялық-құрғату қондырғысы, мал тасымалдауға арналған 6 мамандандырылған автокөлік және биологиялық қалдықтарды жоюға арналған 1 инсинератор берілді. Барлық техника биологиялық қауіпсіздік талаптарына толық сәйкес келеді және елді мекендерде жылжымалы дезинфекциялық жұмыстар жүргізуге арналған.
Арнайы техникамен қатар, аудандық филиалдардың қызметкерлеріне қызметтік автокөліктердің де кілттері табыс етілді.
- Өскемен және Риддер қалалары – бір-бір дезинфекциялық қондырғыдан;
- Глубокое және Алтай аудандары – бір-бір қондырғыдан;
- Зайсан, Күршім, Самар, Катонқарағай, Тарбағатай және Ұлан аудандары – дезинфекциялық қондырғылар мен мал тасымалдауға арналған арнайы көліктер алды;
- Шемонаиха ауданы – «Газель» базасындағы дезинфекциялық қондырғы алды.
Бұл техника мамандарға дезинфекциялық шараларды жедел әрі толық көлемде жүргізуге мүмкіндік береді. Әсіресе, күз-қыс мезгілдерінде ауыл шаруашылығы жануарлары арасында инфекция тарау қаупі артқан кезде аса маңызды.
Мемлекет ветеринариялық қызметті кезең-кезеңімен жаңғыртып, ауылдық жерлердегі мамандардың сапалы жұмыс істеуіне жағдай жасап келеді.
Жаңа техника аудандық мамандарға үлкен көмек және өңірдегі ветеринариялық қауіпсіздік деңгейін арттыруға ықпал етеді. Шығыс Қазақстан облысы алдағы уақытта да ветеринариялық бөлімшелердің техникалық жарақтандырылуын күшейтіп, жануарлар денсаулығын қорғау инфрақұрылымын дамытуға ниетті. Бұл өңірдің ветеринариялық қауіпсіздік жүйесін жаңа сапалық деңгейге көтеруге мүмкіндік береді.
Аударған: Айгүл Базарова
Авторы: Дамир Омаров
Фото: Жібек Нұрахмет
