ШҚО Зайсан ауданы әкімдігінің хабарлауынша, 14 қараша күні сағат 14.30-да Аққойын асуында көмір тиеген бес жүк көлігі мен жүк тиегіш  ылдидан төмен жүре алмай тоқтап қалған.

Техникалардың алға жылжуына таулы аймақтағы көктайғақ жол кедергі келтірген. Адамдар өз күшімен тығырықтан шығуға тырысқан. Алайда бұл әрекеттерінен еш нәтиже шықпаған соң кешкі сағат 19.30 шамасында билік пен төтенше жағдайлар қызметі өкілдері көмекке келді, деп хабарлайды Altaynews.kz тілшісі.

Жергілікті билік туындаған мәселені дереу шешуге кіріскен. Аудан әкімі, ТЖД-ның аудандық бөлімшесінің бастығы техникалық көмекті жұмылдырып, өздері де оқиға орнына аттанған.

Осы уақытта қиын жағдайға тап болған адамдарға бірнеше техника мен мамандар көмекке жіберілді.

Ауа райын ескере отырып, техникалық көмек қатарында қосымша тиегіштер мен қуатты жүк көліктерінен бөлек «Кунг» техникасы да жіберілген. Жол-көлік инспекциясы қызметі мәселе шешілгенге дейін патрульдейтін болады. Барлық күштер жұмылдырылды, биліктегілер мәселе жақын арада шешіледі деген сенімде.

Біз жағдайды бақылап, оқиғаның өрбуіне қарай хабарлап отырамыз.