Бақылау-кассалық машиналарды қолдану талаптары: Салық төлеушілерге ескерту
Қазақстан Республикасында ақшалай есеп айырысулар деректерді тіркеу және беру функциясы бар бақылау-касса машиналары арқылы жүзеге асырылады. Мемлекеттік тізімге енгізілген БКМ қолдану ақшалай есеп айырысулар кезінде міндетті шарт болып табылады, тек кейбір ерекше санаттарды қоспағанда,- деп хабарлайды Altainews.kz тілшісі.
БКМ қолдану кезінде бірқатар талаптар қойылады. Салық төлеуші қызметті бастамас бұрын, БКМ-ды салық органында тіркеп, тауар, жұмыс немесе қызмет үшін төлем алған жағдайда чек беруі міндетті. Салық кодексінің 166-бабының 6-тармағына сәйкес, БКМ чегінде міндетті реквизиттер болуы керек, оның ішінде тауардың, жұмыстың немесе қызметтің атауы жазылады.
2018 жылғы 16 ақпандағы ҚР Қаржы министрінің № 208 бұйрығы бойынша, БКМ чектерінде қазақ әліпбиінің арнайы әріптері пайдаланылуы тиіс. Онлайн БКМ чектері екі тілде - мемлекеттік және орыс тілдерінде басылып шығуы қажет.
Салық төлеушілерге заң талаптарын сақтау және қызмет барысында бұзушылықтардың алдын алу мақсатында, чектерді екі тілде басып шығаруды қамтамасыз ету ұсынылады.