Алакөлде скутер аударылып, екі адам суға кете жаздады
Алакөл көлінде екі демалушының скутермен серуендеуі қайғылы жағдаймен аяқталуы мүмкін еді. Дегенмен күнделікті кезекшілік жүргізетін жедел-құтқару жасағы дер кезінде көмекке келіп, үлгерген.
Оқиға 8 шілдеде болған: ер адам мен әйел адам скутермен серуендеген. Жағадан шамамен 400 метр жерде көлік аударылып қалған. Мұны кезекшіліктегі құтқарушылар дер кезінде байқаған.
- Құтқарушылар жеке қайықпен оқиға орнына жедел барды. Скутерден ұстанып тұрған әйел біраз есеңгіреп қалған. Құтқарушылар демалушыларды қайыққа жақындатып, бортқа көтерілуге көмектесті. Осылайша суға батып кете жаздаған екі адам жағаға жеткізілді, - деп хабарлайды ШҚО ТЖД баспасөз қызметі.